Ciucculatu muricanu

[Gianni Di Giorgio]

CIUCCULATU MURICANU

Ri cuarchi annu Muorica,

‘mmienzu a tanti furistieri

‘ntê ‘n-sabutu e duminica

viri l’arti rê durcieri.

Caminannu pi lu Cursu

e furriannu ‘ntra li stendi

pari forra nu cuncursu

comu sunu tutti attenti.

Mancu ‘u tiempu ri taliari

ca ti tìrunu lu çiatu

pronti a fàriti tastari

lu sa raru ciucculatu.

Tavuletti râ Campania

vanigliatu piemuntisi

lu funtenti râ Tuscana

latti e nuci calabrisi.

Chi su’ mastri sti durcieri

ntô sfurmari ‘u ciucculatu…

‘nzi finissi ri tastari

‘n-cosaruci tantu amatu!

Ma lu nuostru paisanu

lu palatu avi viziatu,

pirchì è a Muorica ca fanu

lu ciù miegghiu ciucculatu.

 

Gianni Di Giorgio